Tanggap Ing Sasmita

Tanggap ing Sasmita

Apa jiwamu wis kokgegulang

Bisa nampa sakehing piwulang

Bisa nanggepi kang aran pepedhang

Ngrasa lan ngrasuk sasmita sasmita saka kanane

Kang rumamyang anarawang kehkehane

Apa ragamu wis kokpesu

Tlesih mandhiri sakehing napsu

Pranyata tatag tanggon ora pinulas ing semu

Cegah dhahar

Isih kepara akeh sing takon dina iki apa mangan

Jer nomer siji rak dudu setoran

Nanging kawilujengan

Muga – muga padha ngerti para juragan

Ora mung waton bisa onjo

Ora mung waton oso

Nyuda guling

Isih akeh banget sing mbutuhake pitulunganmu

Pitulungan kang nyata

Bisa katampa bisa rinasa

Bisa ndunungake dununging manungsa

Lamun urip iki ora mung tumuju marang kaprawiran

Harak muspra kinubur ing kanisthan

Tong bubrah kranjang sampah kang anadhah

Iki dadia sesanti

Yen ora kaudi iya ora bisa dadi

Mulane

Jiwa ragamu apa wis kokdunungake

Dadia radhar mrih tanggap ing sasmitaNe.

Pustaka Candra No.84 Maret 1987